बॉर्डर-गावसकर ट्रॉफीच्या निमित्ताने..

मी क्रिकेट बोलतोय! मी संघांना जिंकताना बघितलंय, मी संघांना हरताना बघितलंय. मी अनेक संघांना हरल्यानंतर निराशेच्या गर्तेत अडकलेलं बघितलंय. त्याचसोबत मी संघांना हरल्यानंतर पुन्हा जोराने तयारी करून पलटवार करतानाही बघितलंय. मी संघांना जिंकल्यानंतर विजयाच्या धुंदीत मदोन्मत्त झालेलं बघितलंय. याचसोबत अनेक संघांना मी नम्रतेने विजय स्वीकारताना बघितलंय! मी सर्व खेळाडूंना अगदी जवळून बघितलंय. मी खेळाडूंना यशाच्या शिखरावरून दरीत पडताना बघितलंय. त्याचसोबत अनेक खेळाडूंना अपयशाची दरी पार करून यशाचे शिखर सर करतानाही बघितलंय. मी खेळाडूंची जिद्द, चिकाटी, धैर्य बघितलंय, आत्मविश्वास बघितलाय! मी अनेक सामने आणि अनेक श्रुंखला बघितल्या आहेत. पण यातले असे खूप कमी सामने आहेत किंवा खूप कमी श्रुंखला आहेत ज्या आजही मला जशाच्या तशा आठवत आहेत. २०२०-२१ मध्ये झालेली बॉर्डर-गावसकर ट्रॉफी ही एक अशीच श्रुंखला आहे जी मला अजूनही नीट लक्षात आहे.